Kursi i frangut detyron ndërmarrjet të zgjasin orarin e punës

Në një situatë të tillë kanë ardhur prodhuesi i njohur i aparateve të amvisërisë V-Zug dhe ai i vagonëve Stadler Rail

Njëra nga pasojat e paralajmëruara të forcimit të frangut, që nga fillimi ka qenë zgjatja e orarit të punës pa rritje të pagës, në ndërmarrjet ekonomike që eksportojnë mallrat e tyre. Në kushtet e krijuara rishtas kjo do të ishte mundësia e vetme për ato ndërmarrje që të mbajnë nivelin e konkurrencës.

Gjendja aktuale në ekonominë e Zvicrës po detyron gjithnjë më shumë ndërmarrje eksportuese që të marrin një masë të tillë jo shumë popullore.

Ndër më të rejat dhe më të rëndësishmet që kanë ardhur në një situatë të tillë janë prodhuesi i njohur i aparateve të amvisërisë V-Zug. Të gjithë, 1400 të punësuarit në këtë kompani nga marsi do të fillojnë të punojnë nga katër orë në javë më shumë se deri më tash. Kështu bën të ditur ndërmarrja përmes një komunikate për shtyp të publikuar të martën.

Edhe kompania e njohur për prodhimin e vagonëve Stadler Rail në Zvicrën lindore, pronë e deputetit nacional nga SVP Peter Spühler, është detyruar t`ua zgjasë orarin e punës punëtorëve të saj. Tri orë në javë më gjatë se deri më tash do të punojnë për të amortizuar pasojat e kursit të ri të frangut. Kompania ka bërë të ditur se për të marrë këtë hap ka arritur pajtim me sindikatat që përfaqësojnë punëtorët.