Për mirëmbajtjen e rrugëve, nafta 6 centë më shtrenjtë

Mungesa e parave për mirëmbajtjen e rrugëve, e shkaktuar nga automobilët kursyes është një fenomen që ka dalë më shumë në sipërfaqe kohëve të fundit.

Në të vërtetë, në autorrugët e Zvicrës po shtohen makinat që shpenzojnë më pak karburante dhe kështu në mënyrë indirekte po shterron edhe burimi i të ardhurave të shërbimeve për mirëmbajtjen e rrugëve. Kjo sepse ky burim mbushet nga taksa që pronarët e automjeteve paguajnë përmes çmimit të benzinës.

Për të plotësuar këtë boshllëk të krijuar, Këshilli Federal i Zvicrës planifikon të shtojë çmimin e taksës së benzinës të dedikuar për rrugët.

Ai ka miratuar të mërkurën projektin për ngritjen e Fondit për Rrugët Nacionale dhe ato të Aglomeracionit  (NAF). Nga ky fond do të financohet funksionimi, mirëmbajtja dhe ndërtimi i rrjetit të rrugëve nacionale, evitimi i ngushticave  si dhe projektet e trafikut në aglomeracione.

Burimi më i rëndësishëm i të ardhurave të këtij fondi do të jetë fitimi mbi tatimin shtesë të naftës. Për fillim ky tatim shtesë do të jetë 6 rapi (centë) më shtrenjtë se deri më tash për litër nafte.