Nuk ka më pica të lira nga Gjermania

Nga tash e tutje porosia e picave nuk do të jetë me levërdi për zviceranët pasi që çdo picë që vjen nga Gjermania duhet të paraqitet në doganë

Pica, ky specialitet kaq i dashur ië Zvicër i kuzhinës italiane, sikur edhe të gjithë artikujt, kushton më shtrenjtë se në Gjermani. Kjo është arsyeja përse shumë zviceranë që jetojnë afër kufirit, porosisin pica nga piceritë gjermane.

Në fakt, kanë porositur. Sepse nga tash e tutje ky veprim nuk do të jetë me levërdi për zviceranët pasi që çdo picë që vjen nga Gjermania duhet të paraqitet në doganë, gjegjësisht të paguhet dogana për të. Kështu ka vendosur Drejtoria e përgjithshme e Doganave të Zvicrës në Bernë.

Për një kohë të gjatë autoritetet zvicerane kishin toleruar praktikën e „importimit“ në Zvicër të picave nga Gjermania përmes korrierëve të picerive pa kaluar nëpër formalitetet administrative.

Duke arsyetuar ndryshimin e praktikës, autoritetet zvicerane thonë se nuk duan të lejojnë përjashtim nga rregullat e doganës që vlejnë për mallrat tjerë.