Pranon vrasjen me thikë të dy prindërve të tij

Është zbardhur vrasja e dyfishtë që ka ndodhur më 9 korrik të këtij viti në Sarmenstorf të kantonit Aargau. 32 vjeçari Andrea ka pranuar se ai ka vrarë duke i therur me thikë dy prindërit e tij në shtëpinë ku banonin, shkruan 20minuten.ch. Pranimin e veprës e ka bërë që në marrjen e parë në pyetje.

Edhe gruaja e tij 29 vjeçe ishte e dyshimtë për pjesëmarrje në krim, ka njoftuar sot prokuroria e përgjithshme e Aargaut, por në mungesë të fakteve ajo është liruar sot nga burgu për hetime.

Shkak për vrasjen e rëndë ka qenë një konflikt familjar, thotë prokuroria duke përcjellë atë që ka dëshmuar dorasi, transmeton albinfo.ch. Por, si ai ashtu dhe bashkëshortja kanë mohuar vendosmërisht përfshirjen e saj në vrasjen e babait 64 dhe nënës 60 vjeçare të djalit.

Organet hetuese kanë konfiskuar armën me të cilën është kryer krimi, një thikë portative. Shërbimi teknik i kriminalistikës në kuadrin e Policisë Kantonale të Aargaut është duke bërë vlerësimin e të gjitha gjurmëve të gjetura.