Shefi i Reiffeisenbank: Sekreti bankar i ka ditët e numëruara

Shefi i ri i bankës Raiffeisenbank , Patrik Gisel ka dalë me konstatimin e tij se sekreti bankar i Zvicrës, në formën që ka tash, nuk do të mund të qëndrojë për një kohë të gjatë. Ai e konsideron si më të mundshëm variantin e futjes në veprim të këmbimit automatik të informacioneve. “Unë mund ta imagjinoj fare qartë se do të jetë kështu.

I gjithë debati po shkon në atë drejtim. Është fjala për një debat të cilin qytetarët e Zvicrës do të detyrohen ta udhëheqin në vite që vijnë, ka thënë Gisel në intervistën dhënë gazetës “Schweiz am Sonntag”.

Duke folur rreth iniciativës që vjen nga disa qarqe të SVP-së dhe FDP-së për forcimin e sekretit bankar, shefi i ri ka thënë se parimisht e konsideron legjitim këtë preokupim. “Flitet për vlera bazike, të cilat Zvicra i posedon prej shekujsh dhe me të cilat duhet vepruar me shumë maturi”, ka thënë Gisel. Por, ka shtuar ai, mbetet skeptik nëse sfera private do të mund të futet në tekstin e kushtetutës në masën e kërkuar.

Ai ka thënë se i përket partisë Liberale (FDP), është anëtar pasiv dhe paguan anëtarësinë. Deri më tash Gisel ka qenë njeriu numër dy në Raiffeisen Bank. Postin e të parit ai do të fillojë ta ushtrojë në tetor, ku do të zëvendësojë shefin e deritashëm Pierin Vincenz.