Shqipëria aplikon regjim të lëvizjes së lirë pa viza për muajt e verës

Heqja e regjimit të vizave me disa shtete që kanë shprehur interesimin e tyre për turizmin në Shqipëri ka nisur të japë rezultatet e para.

Në Shqipëri, siç raportojnë mediat në Tiranë, mbërriti grupi i parë i turistëve nga Ukraina, Rusia, Bjellorusia dhe Kazakistani.

Me këto vende Shqipëria aplikon për herë të parë regjimin e lëvizjes së lirë pa viza për muajt e verës. Periudha është nga 1 qershori deri më 1 nëntor.

Sipas Ministrisë së Zhvillimit Ekonomik dhe Turizmit, kjo nismë është në kuadër të planit të masave për rritjen e turizmit, duke lehtësuar hyrjen në Shqipëri të shtetasve nga disa vende.

Veç  Ukrainës, Rusisë, Bjellorusisë dhe Kazakistanit, pjesë e regjimit pa viza këtë vit janë edhe Arabia Saudite, Katari, Omani, Bahrejni dhe Gjeorgjia.​