Zvicra, në vendin e tetë për cilësinë e arsimit në botë

Vendet aziatike kryesojnë listën e sistemeve më të suksesshme të arsimit, sipas hulumtimit të fundit nga Organizata për Bashkëpunim dhe Zhvillim Ekonomik OECD.
Pesë vendet e para në listën e shkollimit cilësor janë Singapori, Hong Kongu, Koreja e Jugut, Japonia dhe Tajvani. Pastaj vijnë vendet evropiane, të tilla si Finlanda, Estonia, Zvicra dhe Holanda, ndërsa 10 të fundit përfundojnë me Kanadën.

Hulumtimi bëhet në bazë të rezultateve të testeve në matematikë dhe shkenca natyrore dhe pretendon të jetë një tregues i hartës më të gjerë globale të standardeve arsimore të testimit „PISA”, e cila kryesisht fokusohet në vendet e industrializuara.

Në listën e vendeve të rajonit, Maqedonia ka zënë vendin e 65-të nga 76 vende, Serbia është e 42-ta, Mali i Zi është në vendin e 56-të, ndërsa Kroacia ka një sukses të mirë dhe është në vendin e 34-të. Sllovenia është vendi me sistemin më të mirë të arsimit në Ballkan dhe zë vendin e 18-të.

Tabela tregon problemet në arsimin amerikan, e cila figuron në vendin e 28-të me Italinë dhe Suedinë, të cilët javën e kaluar kanë marrë një paralajmërim nga OECD për shkak të problemeve serioze në sistemin e arsimit.

Organizata për Bashkëpunim Ekonomik dhe Zhvillim tha se hulumtimi tregon qartë lidhjen mes arsimit dhe rritjes ekonomike.

“Kjo është hera e parë që të ketë një pamje globale të cilësisë së arsimit”, ka thënë drejtori i arsimit OECD, Andreas Shlicher.

Raportin e publikuar nga OECD e kanë përgatitur Eric Hanushek nga Stanford dhe Lucer Voesman nga Universiteti i Mynihut. Ata theksojnë se standardet e arsimit mund të parashikojnë se si vendi do të krijojë pasuri në afat të gjatë.

“Politikat dhe praktikat e dobëta arsimore kanë lënë vendet në një gjendje të përhershme të recesionit”, thotë raporti.

Përmirësimi i arsimit do të krijonte “përfitime të shkëlqyera ekonomike afatgjata”, thonë ekspertët.

Gana është vendi më së keqi i renditur për cilësinë në arsim.