Zvicra, vendi i dytë në botë për kirurgji plastike

Vetëm në Brazil më shpesh u nënshtrohen operacioneve plastike sesa në Zvicër. Klientela e kirurgjisë plastike është gjithmonë më e re - dhe meshkuj.

Keystone

Biznesi i bukurisë është gjithnjë në rritje. Sipas Asociacionit Ndërkombëtar të Kirurgjisë Plastike (iSAPS) dhe Qendrës këshillimore për kirurgji kozmetike Acredis, 53.300 operacione plastike janë kryer në Zvicër në vitin e kaluar.

Bëhet fjalë për 644 operacione kirurgjike në 100.000 banorë – gati sa në Brazil (661). Dhe madje, edhe 38 për qind më shumë se në SHBA.

Klientela është gjithashtu e re, tregon një studim i “Sonntagszeitung” dhe “Le Matin DIMANCHE”, pas një ankete me 200 mjekë të kirurgjisë plastike, përcjell albinfo.ch.

Në dekadën e kaluar, intervenimet plastike janë dyfishuar, thotë një kirurg i Gjenevës, Badwi Elias.

Te gratë janë shtuar intervenimet e gjinjve dhe korrigjimet e qepallëve.

Dendësia më e madhe e kirurgëve plastikë është në Zvicrën Perëndimore dhe Ticino. Në Gjenevë numërojnë gjashtë mjekë në 100.000 banorë, në Vaud dhe Ticino janë pesë.

Kantoni i Cyrihut ka 2.8 kirurgë plastikë për 100.000 banorë, vetëm pak mbi mesataren e përgjithshme zvicerane.